Cebu Provincial Government
Cebu Provincial Government

ARTICLE

Ngano angay nga ilisan ang inyong karaang “papel de banko” or “kwartang papel” karong tuiga

Nag-awhag ang Bangko Sentral ng Pilipinas (BSP) sa tanang Sugbu-anon sa paghinay-hinay na sa pagpa-ilis sa ilang karaang “papel de banko” karon tuiga.

Ang BSP nagpahibalo sa publiko nga gisugdan na karong tuiga ang “demonetization” o pagwagtang sa balor sa karaang kwartang papel nga “New Design Series” o NDS subay sa Section 57 sa Akta Republika 7653 nga naila isip Central Bank Act.

Subay sa maong balaod, ang BSP gihatagan ug gahom sa pag-ilis sa kwartang papel nga naa sa sirkulasyon nga sobra na sa 5 ka tuig. Ang kwartang papel nga NDS gigamit sukad pa sa 1985.

Subay niini, ang publiko gipahimangnuan nga ang karaang kwartang papel mahimo pang gamiton pambayad o pamalit sa mga produkto, serbisyo ug uban pang transaksyon hangtod sa Disyembre 31, 2015. Human niining petsaha, ang NDS dili na mahimong gamiton.

Apan sugod sa Enero 1, 2015 hangtod Disyembre 31, 2016, ang karaang kwartang papel nga NDS mahimo kini mapailisan ug bag-ong kwartang papel nga mao ang New Generation Currency (NGC) sa tanang bangko o sa nagkalain-laing buhatan sa BSP.

Uban sa pag-abag sa Probinsiya sa Sugbo ug sa Cebu Association of City and Municipal Public Information Officers o CAOCAMPIO, gipaningkamutan sa BSP ang pagpakatap ngadto sa kabarangayan, ilabi na sa hilit og bukiran nga lugar, kabahin sa karaang kwartang papel nga dili na unya madawat isip nga pangbayad inig kapupus sa tuig 2015.

Ang mga buhatan o mga ahensya sa goberyno nga naghupot sa karaang kwartang papel nga dili mailisan sulod sa gitakda nga panahon, sama sa gigamit nga ebidensya sa korte, kinahanglan nga magpahibalo sa BSP sa dili pa mulapas ang maong petsa aron mahatagan ug hustong panahon sa pagpailis niini.

Alang sa mga Overseas Filipinos Workers o OFW nga may karaang kwarta nga dili mailisan sulod sa gitakdang panahon, gi-awhag usab sa pagparehistro sa BSP website sugod sa Oktubre 1 hangtod sa Disyembre 31, 2015 alang sa samang katuyoan.

Sugod sa Enero 1, 2017, ang mga karaang kwarta wala nay balor o kini ma-“demonetized” na. Dili na sab kini mapailisan ug bag-ong kwarta.

Ang bag-ong kwartang papel o NGC nga gipagawas niadtong Disyembre 16, 2010 gi-ila sa ubang nasud nga may de kalidad nga disenyo ug lisud ma-kopya alang sa kasegurohan sa publiko batok sa mga tigpakatap sa peke o mini nga kwarta.

Hulagway sa “New Generation Currency NGC” o bag-ong papel de banko